असोज १४ गते, रौतहट । रौतहटको वृन्दावन नगरपालिका वडा नं ३ ईडेन ग्राडेन विश्रामपुरमा नगरस्तरीय मेयर कप नकआउट टि–ट्वान्टी क्रिकेट प्रतियोगिता बिहिवारदेखि शुरु भएको छ । वृन्दावन नगरपालिकाको आर्थिक सहयोग तथा राजदेवी युवा क्लव हर्षाहाको आयोजनामा सञ्चालन भएको प्रतियोगिताको नगर प्रमुख विनोद प्रसाद पटेलले बिहिवार उद्घाटन गरेका छन् । आयोजित एक कार्यक्रमका बीच मेयर पटेलले खिलाडीहरुसँग क्रिकेट खेलेर प्रतियोगिताको उद्घाटन गरेसँगै प्रतियोगिता शुरु भएको हो ।

एक महिना अर्थात कार्तिक १२ गतेसम्म चल्ने प्रतियोगिताका विजेतालाई नगद रु ५० हजार र उपविजेता टोलीलाई नगद रु ३० हजार रुपैयाका साथै मेडल, ट्रफी र प्रमाणपत्र प्रदान गरिने प्रतियोगिताका संयोजक राजदेवी युवा क्लवका अध्यक्ष आशिसराज पटेलले जानकारी दिएका छन् ।

प्रतियोगितामा नगरका वडा नं १ देखी ९ वटै वडाका टोलीहरुबीच प्रतिष्पर्धा हुने जनाइएको छ । प्रतियोगिताको उद्घाटन पछि मन्तव्य राख्दै वृन्दावन नगर प्रमुख पटेलले नगरभित्र खेलकुदको विकास गर्ने तथा युवालाई कुलतबाट बचाउन एवं शारीरिक सुगठन बढाउनका लागि सचेत बनाउने उद्देश्यका साथ मेयर कपको आयोजना गरिएको बताए । नगरले शुरु गरेको मेयर कपले युवाहरुलाई सिर्जनशिल बन्न सहयोग पुर्याउने बताउँदै मेयर पटेलले आगामि दिनमा समेत मेयर कपलाई निरन्तरता दिदै जाने प्रतिबद्धता जनाए । युवाहरुलाई क्रिकेट खेलतर्फ आकर्षित गरी राष्ट्रिय एवं अन्तर्राष्ट्रिय खेलाडी उत्पादन गर्ने उद्देश्यले प्रतियोगिताको आयोजना गरिएको आयोजकले जनाएको छ ।

LEAVE A REPLY

Please enter your comment!
Please enter your name here