काठमाण्डौं, ८ मंसिर ।
सरकारले एशिया सेल्टर फोरम वार्षिक सम्मेलन २०२१ आयोजना गर्ने भएको छ ।शहरी विकास मन्त्रालय, राष्ट्रिय विपद् जोखिम न्यूनिकरण तथा व्यवस्थापन प्राधिकरण र गृह मन्त्रालयको नेतृत्वमा तेस्रो एशिया सेल्टर फोरम वार्षिक सम्मेलन आयोजना हुने भएको हो । सम्मेलनको शीर्षक ‘आवास तथा बस्तीसम्बन्धी क्षेत्रीय सिकाइ एवं सहकार्य’ रहेको छ । सम्मेलनमा जूम मिटिङबाट सहभागीता जनाउन सकिनेछ भने भौतिक रुपमा उपस्थित हुन चाहनेहरुले ललितपुरको कुपण्डोलस्थित होटल हिमालयमा जानुपर्नेछ । सम्मेलनको उद्घाटन शहरी विकासमन्त्री रामकुमारी झाँक्रीले गर्ने हुनुभएको छ भने आवास तथा बस्तीसँग सम्बन्धित राम्रा अभ्यास, सिकाइ तथा चुनौति एवं नेपालले कार्यान्वयन गरेका कार्यहरुको बारेमा छलफल हुने बताइएको छ । सबै सत्रहरुमा विगतमा सिकाएको पाठको अभिलेखीकरण गर्नुका साथै नेपालको आवाससम्बन्धी हासिल गरेका अभ्यासलाई सुदृढीकरण गर्नका लागि भावी रणनीतिबारे छलफल गरिने गैसस महासंघ नेपाल तथा आवास पुनस्र्थापना तथा पुनर्निर्माण समन्वय मञ्च (एचआरआरपी) का राष्ट्रिय संयोजक मिनार थापामगरले जानकारी दिनु भयो । उहाँले सम्मेलनमा दीर्घकालीन पुनर्लाभ सम्बन्धी छलफल गरिने बताउँदै सम्मेलनले एशिया प्रशान्त क्षेत्रमा अवस्थित आवास सम्बन्धी कार्य गर्ने अध्येता एवं संघ संस्थालाई एकै ठाउँमा ल्याएर बलियो सञ्जाल स्थापना गर्ने बताउनु भयो ।संयोजक थापामगरले भन्नुभयो, ‘सबै सत्रहरुमा विगतमा सिकाएको पाठको अभिलेखीकरण गर्नुका साथै नेपालको आवाससम्बन्धी हासिल गरेका अभ्यासलाई सुदृढीकरण गर्नका लागि भावी रणनीतिबारे छलफल गरिनेछ, सम्मेलनमा दीर्घकालीन पुनर्लाभ सम्बन्धी छलफल गरिनेछ, सम्मेलनले एशिया प्रशान्त क्षेत्रमा अवस्थित आवास सम्बन्धी कार्य गर्ने अध्येता एवं संघ संस्थालाई एकै ठाउँमा ल्याएर बलियो सञ्जाल स्थापना गर्नेछ, यसले विभिन्न देशमा भइरहेका विपद्का समस्याहरु साटासाट गर्ने थलोको रुपमा लिन सकिन्छ, त्यहाँ कसरी काम भयो ? एशियामा केही विपद् आए कसरी समाधान गर्ने, तत्काल कसरी वासको समस्या हटाउने भन्ने बारेका चासो राख्ने गर्छ ।’राष्ट्रिय संयोजक थापामगरले सम्मेलनले विभिन्न देशहरुमा हालै भएका विपद्का घटनाबाट सिकाएको पाठ, अनुभव तथा त्यसको प्रतिकार्यबारे पनि छलफल गर्ने बताउनु भयो । सम्मेलन यही मंसिर ९ देखि ११ गतेसम्म सञ्चालन हुनेछ ।
