वीरगञ्ज ६ चैत ।
वीरगञ्जबाट लागुऔषध खैरो हिरोइनसहित एक १७ वर्षीय किशोर पक्राउ परेका छन् । शुक्रबार लागुऔषध नियन्त्रण ब्यूरो वीरगञ्जको टोलीले वीरगञ्ज महानगरपालिका १४ पावर हाउस चोकमा चेकजाँचको क्रममा ३० ग्राम खैरो हिरोइनसहित ती किशोरलाई प्रहरीले नियन्त्रणमा लिएको हो ।
चेकजाँचको क्रममा किशोरले बोकेको ६ वटा सेतो प्लाष्टिकको पोकाभित्र लुकाइछिपाइ ल्याएको लागुऔषध खैरो हिरोइन ३० ग्राम बरामद गरिएको पर्साका प्रहरी प्रवक्ता ओम प्रकाश खनालले जानकारी दिए । लागुऔषधसहित पक्राउ परेका किशोरलाई जिल्ला अदालतबाट पाँच दिनको म्याद थप गराइ अनुसन्धान अगाडि बढाइएको खनालले बताए ।
