बाँके १८ असोज ।
कोहलपुरस्थित शिक्षण अस्पतालमा उपचाररत एक सुत्केरीको कोरोना सङ्क्रमणबाट मृत्यु भएको छ । भीमदत्त नगरपालिका–२ महेन्द्रनगर कञ्चनपुर निवासी २९ वर्षीया सुत्केरीको आइतबार उपचारकै क्रममा मृत्यु भएको हो ।

स्वास्थ्य कार्यालय बाँकेका कोरोना स्रोत व्यक्ति नरेश श्रेष्ठका अनुसार सेती अस्पताल धनगढीमा उनले जुम्ल्याहा सन्तान जन्माएकी थिइन् । बच्चा जन्मिएपछि उच्च रक्तश्रावका कारण पाठेघरको शल्यक्रिया गर्नुका साथै आठ पिन्ट होल रगत र चार पिन्ट प्लेटीलेस रगत दिँदा पनि स्वास्थ्यमा सुधार नआएपछि थप उपचारका लागि शिक्षण अस्पताल कोहलपुरमा सिफारिस गरिएको थियो ।

सेती अस्पतालको प्रयोगशालामै असोज १४ गते गरिएको स्वाब परीक्षणमा उनलाई कोरोना पोजेटिभ देखिएको थियो । असोज १५ गते अपराह्न ४ बजे शिक्षण अस्पतालमा भर्ना हुँदा बिरामीको अवस्था जटिल र बेहोस रहेको स्रोत व्यक्ति श्रेष्ठले जानकारी दिनुभयो ।

बिरामीको अवस्थानुसार गरिनुपर्ने सबै प्रकारका उपचार गर्दा समेत अवस्थामा सुधार आउन नसकी उपचारकै क्रममा मृत्यु भएको उहाँले बताउनुभयो । यससँगै बाँकेमा अस्पतालमा बाहिरी जिल्लाबाट आएर उपचारका क्रममा कोरोनाबाट मृत्यु हुनेको सङ्ख्या नौ पुगेको छ । बाँकेका मात्रै २० जनाको कोरोना सङ्क्रमणका कारण मृत्यु भइसकेको छ ।

LEAVE A REPLY

Please enter your comment!
Please enter your name here