काठमाडौं ।
महोत्तरीको रामगोपालपुर नगरपालिका–२ का वडाध्यक्ष मुकेशकुमार यादवको मृत्युबारे सत्यतथ्य छानविनका लागि उनको परिवारले माग गरेको छ । मंगलबार रिपोर्टर्स क्लब नेपालमा पत्रकार सम्मेलन गरी मृतक मुकेशका आफन्तहरुले घटनाको अवस्था हेर्दा दुर्घटनाबाट मृत्यु भएकोमा शंका रहेको बताएका हुन् ।गत भदौ ९ गते विहान मुकेश बर्दिबास–१२ स्थित सडक छेउमा मृत फेला परेका थिए । मृतकका परिवारले बताएअनुसार उनी स्थानीय शिक्षक सन्दीप झाले बोलाएपछि बर्दिबास गएका थिए । मुकेश बर्दिबास पुगेपछि सन्दीप, दिलिकुमार मण्डल र दुईजना केटीहरुले राजु होटलमा खाजा खाएको पाइएको उनले बताए ।राजु होटलका सञ्चालको भनाइ उद्धृत गर्दै मृतक मुकेशका आफन्तले बताएअनुसार उनलाई सन्दीप, दिलिपलगायतले रातको ८ः३० बजे गौरीडाँडाको होटलमा जाने कर गरेका थिए । उनीहरुले कर गर्दा पनि मुकेश जान नमानेको बताइएको छ ।मृतक मुकेशका दाजु सतनप्रसाद यादवले उक्त घटनाको अनुसन्धान नेपाल प्रहरीको केन्द्रीय अनुसन्धान व्यूरो (सीआईबी) ले गर्नुपर्ने बताए । उनले घटनाको प्रकृति हेर्दा मोटरसाइकल दुर्घटनामा मुकेशको मृत्य भएको विश्वास गर्न नसकिने बताए । उनले स्थानीय प्रहरी प्रशासनले पनि यस घटनालाई गम्भीरतापूर्वक नलिएको बताए ।‘उक्त घटना भएर पोस्टमार्टमका लागि शव काठमाडौं लगिएपछि अर्को दिन सन्दीप झालाई प्रहरीले सामान्य सोधपुछ गरेर सोधेको छ । मुकेशसँग सम्पर्कमा रहेका व्यक्तिहरुको गम्भीरतापूर्वक छानविन गरेमा सत्यतथ्य पत्ता लाग्छ । प्रहरी प्रशासन यसमा गम्भीर नभएको आशंका छ । यस्तो अवस्थामा केन्द्रीय अनुसन्धान व्यूरोको यो घटनाप्रति ध्यानाकार्षण होस्,’उनले भने ।महोत्तरीको साम्सी गाउँपालिका–१ का वडा अध्यक्ष एवं नेपाली कांग्रेसका नगर सभापति विपिन विहारी यदुवीरले मृतक मुकेशको हत्यारा पत्ता लगाउन राज्यले आनाकानी गरेको बताए ।मृतक मुकेशको मृत्युबारे सत्यतथ्य पत्ता लगाउन दवाब दिन आफूहरुले महोत्तरी जिल्लाभरका वडाध्यक्षहरुको समिति नै बनाएको बताए । राजनीतिक इन्ट्रेस्ट र लेनदेनको विषयमा मुकेशको हत्या भएको उनले दाबी गरे ।‘हाम्रो पनि विवेकले ठम्याएको छ– मुकेशको निर्ममतापूर्वक हत्या गरिएको छ । हामीले १५ गते शनिबार वडाअध्यक्षहरुको बैठक हुँदा यो हत्या नै हो भन्ने निश्कर्ष निकालेका छौं,’उनले भने ।
