लुम्बिनी १२ असोज । रुपन्देहीमा ट्रयाक्टर दुर्घटनामा परेर एक बृद्धाको मृत्यु भएको छ । मृत्यु हुनेमा रुपन्देहीको गैडहवा गाँउपालिका वडा नं. ३ बस्ने ६० बर्षीय गायत्री चौधरी रहेकी छिन् । मृतकलाई भीम अस्पताल भैरहवामा पोष्टमार्टम पश्चात आवश्यक अनुसन्धान अगाडी बढाइएको ईप्रका लुम्बिनीका प्रहरी निरीक्षक ईश्वर कार्कीले जानकारी दिए । लु ३ त ४३९४ नं. को ट्रालीट्रयाक्टर गैडहवा ३ गोबडउरी जाने बाटोमा अनियन्त्रित भई पल्टिएपछि च्यापिएर बृद्धा चौधरीको घटना स्थलमै मृत्यु भएको प्रहरीले जनाएको छ । सोही ट्रयाक्टरमा सवार गैडहवा ३ बस्ने ६५ वर्षीय निशा चौधरी, १७ वर्षीय सुग्रीम हरिजन, १० वर्षीया महिमा कोहाँर लगायत ११ जना घाइते भएका छन् । घटनास्थलमा पुगेको प्रहरी टोलीले घाइतेहरुलाई उद्धार गरि उपचारका लागि मेडिकल कालेज भैरहवा पठाउनुका साथै फरार ट्रयाक्टरधनी र चालकको खोजी भैरहेको जनाएको छ । २५ जना महिला र पुरुष बोकेर हिँडिरहेको ट्रयाक्टरले तीब्र गतिमा ओभरटेक गर्न खोज्दा दुर्घटना भएको स्थानीय र प्रहरीको भनाई छ ।
